Бэс ыйын 20 күнүгэр Бороҕон нэһилиэгэр Россияҕа «Норуоттар сомо5олоһууларын», Саха республикатыгар Культура, Уус-Алдан улууһугар «Түмсүү уонна бииргэ буолуу», Бороҕон нэһилиэгэр «Үтүө санаа уонна өйөбүл» сылларын чэрчитинэн Үрүҥ тунах ыһыах ыытылынна. «Ыһыах алгыһын куппар-сүрбэр иҥэрэн» ыһыах алгыһын «Түмсүү» НАК айымньытын киинин иһинэн үлэлиир «Айыллан» норуот театрын режиссера, анал фольклор үөрэхтээх Макаров А. А. алҕаата, арчылаата. «Кымыс үрдүн охторуу» сиэрэ-туома ыытыллар түһүлгэтигэр тиийэн Бороҕон нэһилиэгин баһылыгын эбээһинэһин толорооччу Копырин К.М. кымыс үрдүн охторорго анал чороону туттарда, Лилиана Петухова бар дьонун ырыанан эҕэрдэлээтэ. Бу кэннэ мустубут дьон-сэргэ кыынньар кымыһынан сүрэхтэрин сөрүүкэттилэр, самаан сайын үөрүүтүн үллэстэн киин трибунаҕа ыһыах үөрүүлээх чааһыгар муһуннулар. Нэһилиэк баһылыгын эбээһинэһин толорооччу Копырин К. М. Үрүҥ тунах ыһыах бэлиэтин Ытык Дуоҕаны дьоһуннаах миэстэтигэр аста, уйгу быйаҥ ыһыаҕынан эҕэрдэтин тиэртэ, үлэлэригэр ситиһиилэммит дьонун чиэстээтэ, наҕараадалары туттарда. Россия5а «Норуоттар сомо5олоһууларын сылларыгар аналлаах эҕэрдэ кэнсиэр үҥкүүнэн, ырыанан доҕуһуолланна, Республикаҕа культура сылын чэрчитинэн «Көмүлүөк» үһүс саас оскуолатын чилиэннэрин көрдөрүүтүгэр «Якутия мастеровая» сахалыы таҥастаах сэлэлээн хаамыы кыттыылаахтара сукунаттан тигиллибит сахалыы соннорун, маны тэҥэ Бороҕон нэһилиэгин талба талааннааҕа, Уус-Алдан улууһун норуотун маастара Габышева А. Г. тикпит таҥастарын дефилета көрөөччү дьүүлүгэр таҕыста. Эҕэрдэ кэнсиэр күргүөм оһуокайынан түмүктэннэ, оһуохайы таһаарда «Оһуохай сайдыытыгар аарыма кылаатын иһин» бэлиэ хаһаайката, оһуохайы этээччи Габышева Т. Г. Нэһилиэк олохтоохторо, ыалдьыттара ыһыах мааны түһүлгэтигэр түөлбэлээн олорон ыһыах маанылаах сандалы тула ирэ-хоро кэпсэтэн, ыһыах ыытар күрэхтэрин сэргии көрдүлэр, ол курдук: түөлбэлэр икки ардыларыгар «Норуоттар сомоҕолоһууларын» сылыгар анаан түөлбэнэн араас норуоттар бүлүүдэлэригэр, түһүлгэни киэргэтиигэ күрэхтэстилэр. Көрүү түмүгүнэн 1 м «Үрдэл» түөлбэ начальник Винокурова М. П. 2 миэстэ «Дьулуур» начальник Капитонова Н. П., 3 миэстэ «Эрэл» начальник Петухова П.М., улахан дьоҥҥо анаан «Эллэй эһэбит саҕаттан» оһуохай күрэҕэр кылаан чыпчаал Протопопова З.И, 2 миэстэ ыалдьыппыт Тютрина М. С. 18 саастарыгар диэри оҕолорго «Долгуннурар уһун суһуох» күрэҕэ тэрилиннэ. Кылаан чыпчаал Аржакова Уруйдаана, 2 миэстэ Шепелева Тоня, 3 миэстэ Новоприезжая Люба ылары ситистилэр. Маны тэҥэ ыһыах спортивнай күрэхтэрэ бэрт элбэх кыттааччыны хабан хапсаҕайга, мас тардыһыытыгар, сүүрүүгэ, таас көтөҕүүтүгэр илин кэлин түһүстүлэр. Күрэхтэһии сүрүн спонсордарынан буоллулар биир дойдулаахтарбыт Татаев А. Е., ИП Копырин Д. Д., Черкашин П. П., Мухин В. П., ИП Барашков В. И., Сокольникова А. С., Алексеев Е. П., ИП Москвитин И. Н., ИП Бурнашев Ф. В. СР тустууга маастара Васильев Ю.П. дьиэ-кэргэнэ эһэлэрэ, Уус-Алдан улууһун, Бороҕон нэһилиэгин Бочуоттаах олохтооҕо, Саха АССР тыатын хаһаайыстыбатын үтүөлээх үлэһитэ, Сэрии уонна Үлэ ветерана Васильев Петр Константинович 100 сааһыгар анаммыт анал бирииһи хапсаҕай күрэҕэр Петухов Юрий Юрьевичка туттарда.
Киэһээ «Түмсүү» норуот айымньытын киинигэр республикаҕа Культура сылынан «Нэһилиэк библиотекатын историятын», «Көмүлүөк» 3 саас оскуола чилиэттэрин уус-уран оҥоһуктарын быыстапката тэрилиннэ. И. Попов суруйуутугар, «Айыллан» норуот тыйаатырын туруоруутугар «Олох талкыта» комедия толору саала көрөөччүлээх көрөөччү дьүүлүгэр таҕыста. Режиссер А.А. Макаров. Ол кэннэ «Самаан сайын бэлэ5э» сүүйүүлээх оонньуу, ырыа- тойук, үҥкүү-битии тэрилиннэ. Ыһыах дьоро күнэ уоттаах-күөстээх «Үрүҥ түүн» дискотеканан түмүктэннэ.
