Кулун тутар 29 күнүгэр «Түмсүү» с/к Россияҕа, Республикаҕа Аҕа дойдуну көмүскээччилэр сылларынан Улуу Кыайыы 80 сылын көрсө республиканскай, улуснай патриотическай ырыа күрэхтэрин Гран-при хаһаайката, лауреата Анна Петровна Алексеева сырдык кэриэһигэр аналлаах «Кыайыыны ырыанан уруйдаан» аһаҕас, республиканскай байыаннай — патриотическай ырыа күрэҕэ тэрилиннэ. Күрэххэ Мэҥэ-Хаҥаластан, Орто-Халыматтан, Намтан, Ньурбаттан, Уус-Алдан улууһуттан уопсайа 27 кыттааччы кыттыыны ылла. Күрэххэ биирдиилээн ырыаһыттар 18-35 саастарыгар дылы ыччат, 36 сааһыттан үөһэ улахан дьоннор кыттыыны ыллылар. Дьүүллүүр сүбэ бэрэссэдээтэлэ СР культуратын туйгуна Охлопков В. В., СР үөрэҕириитин туйгуна Бурнашев Д. Е., Анна Петровна аймахтарын аатыттан Гоголева Л. Н. күрэҕи дьүүллээтилэр. Анна Петровна ситиһиилэрин, олоҕун кэрдиис кэмнэрин кэпсиир «Олох устун ырыанан» быыстапка хомуллан сырдатылынна, «Кыайыыны ырыанан уруйдаан» ахтыы чааһын «Түмсүү» с/к директора Сухонина А. Е. иилээн-саҕалаан ыытта. Ахтыы киэһэҕэ кыттыыны ыллылар: Анна Петровна бииргэ төрөөбүт быраата, ТСТ «Боро5он нэһилиэгин» аҕа баһылыга Алексеев В. П., сыана ветерана, Анна Петровна дьүөгэтэ Анна Федотовна Алексеева, өр сылларга бииргэ үлэлэээбит социальнай көмүскэл тэрилтэтин аатыттан Парникова Анна Михайловна, сельскай модельнай библиотека сэбиэдиссэйэ Прудецкая Светлана Александровна, «Аал уот» аҕам саастаахтар түмсүү салайааччыта Черкашин Петр Егорович, бииргэ үөрэммит кылааһын оҕолоро Анна Петровнаны истиҥник ахтан-санаан аастылар. Киэһэ «Түмсүү» сынньалаҥ киинигэр дьүүллүүр сүбэ быһаарыытынан бастыҥнар талылланнар Гала кэнсиэргэ кыттыыны ыллылар. ТСТ «Боро5он нэһилиэгин» аҕа баһылыга Алексеев В. П. күрэх спонсордарыгар, күрэх тэриллиитигэр сүүрбүт-көппүт бар дьонугар махтал суруктары, өйдөбүнньүк бэлиэлэри туттарда. Күрэх түмүгүнэн 18-35 сааһыгар дылы кыттааччыларга 1 ст лауреат Афанасий Новоприезжий , 2 ст лауреат Лиана Габышева, 3 ст лауреат Айаал Вырдылин. 1 ст дипломант Марсен Протопопов, 2 ст дипломант Николай Лыткин, 3 ст дипломант Василий Копырин. 36 сааһыттан үөһэ кыттааччыларга 1 ст лауреат Мария Лукаческая, 2 ст лауреат Евдокия Ефимова, 3 ст лауреат Гаврил Шепелев, 1 ст дипломант Иван Сухонин, 2 ст дипломант Владимир Охлопков, 3 ст дипломант Мария Лукачевская буоллулар. Маны таһынан анал ааттар олохтоннулар, ол курдук «Эдэр кэскиллээх ырыаһыт» Андрей Никитин, «Бастыҥ патриотическай ырыа» Василий Петров, «Иэйиилээх ырыаһыт» Лилия Семенова, «Ветеран ырыаһыт» Мария Алексеева, «Бастыҥ көстүүм» Виталий Курилкин, «Кэхтибэт кэрэ куолас» Александра Кычкина, «Ырыа ис хоһоонун арыйыы» Степан Петров, «Кэрэ куолас» Мария Иванова, «Репертуары таба туһаныы» Октябрина Протопопова. «Кыайыыга дьулуурун иһин» диэн туоһу суруктар, харчынан бириистэр туттарылыннылар Антонина Дьяконоваҕа, Анастасия Шепелеваҕа, Егор Гоголевка, Андрей Макаровка, Анатолий Борисовка. Күрэх муҥутуур кыайыылааҕынан Чараҥтан кыайыылаах аатын ылан Николай Бурцев Анна Петровна балта Варвара, Иван Черемкиннар дьиэ-кэргэн олохтообут Кыайыы 80 сылынан 80 тыһыынча уу харчыны тутан үөрүүтэ үксээтэ. Көрөөччү куоластааһынын түмүгүнэн Афанасий Новоприезжий кыайан Гоголевтар дьиэ-кэргэн аймахтара олохтообут 15 000 уу харчынан бириэмийэни тутта. Күрэх сүрүн спонсордарынан буоллулар Анна Петровна дьиэ-кэргэнэ, аймахтара, бииргэ үөрэммит 1974 сыллаах выпустар, улуус социальнай көмүскэл тэрилтэтин ветераннара, Василий, Светлана Васильевтар дьиэ-кэргэн, Новоприезжая В.И, сцена ветераннара, «Аал уот» кырдьаҕастар, «Камелек» 3 саас оскуолата түмсүүлэрэ, «Түмсүү» сынньалаҥ киин коллектива, В.М.Прокопьев аатынан Тумул орто оскуолата. Тэрээһин уопсай хаартыскаҕа түһүүнэн түмүктэннэ, кыттааччылар үөрэн-көтөн, бары илии тутуурдаах, өттүк харалаах тарҕастылар.
