Муус устар 5 күнүгэр Мүрү нэһилиэгэр «Тойон Мүрү» култуура дыбарыаһыгар культуура бэтэрээнэ, көрөөччү кутун туппут дэгиттэр, чаҕылхай талааннаах Никита Константинович Алексеев төрөөбүтэ 85 сылынан аһаҕас өрөспүүбүлэкэтээҕи «Күлүү сүрэх эмчитэ» көр-күлүү күрэҕэ тэрилиннэ. Биһиги нэһилиэктэн «Бэтэкэй Бэтиэкэлэрэ» көр-күлүү бөлөҕө сал. Сухонина А. Е. «Поп Мокей» Никита Алексеев үҥкүүлээбит көрдөөх үҥкүүтүнэн, «Паркаҕа», «Сэдэх бэлэх» сценкаларынан кыттыыны ылла. Күрэххэ уопсайа өрөспүүбүлүкэ араас муннуктарыттан 12 бөлөх кыттыыны ылла. Күрэҕи үүнэр көлүөнэ тыйаатырын артыыстара председатель Бессонов Георгий Кимович, Семенова Екатерина Владимировна, Далбараева Елизавета Алексеевна дьүүллээтилэр. Көрүү түмүгүнэн «Бэтэкэй Бэтиэкэлэрэ» көр-күлүү бөлөҕө 1 ст Лауреат үрдүк аатын ылан 20.000 солк уу харчынан, грамотанан наҕараадаланна. Маны таһынан «Күндү күлүүк» анал аат хаһаайкатынан Анастасия Сухонина, «Бастыҥ режиссер» Андрей Макаров ааттананнар анал бирииһинэн, грамотанан наҕараадаланнылар.
