Тохсунньу 14 күнүгэр «Түмсүү» норуот айымньытын киинигэр Эргэ Саҥа Дьылы көрсө нэһилиэк түөлбэлэрин икки ардыларыгар театрализованнай дьүһүйүүлэри көрдөрүүгэ күрэх тэрилиннэ. Ол курдук «Эрэл» түөлбэ, салайааччыта Петухова Прасковья Михайловна «Арай биирдэ» дьүһүйүү, «Үрдэл» түөлбэ салайааччы Винокурова Мария Петровна «Түөлбэ таҥхата» диэн дьүһүйүүлэри туруоран көрөөччү дьүүлүгэр таһаардылар. Күрэҕи дьүүллээтилэр «Айыллан» норуот тыйаатырын режиссера Макаров А. А., «Үрдэл» түөлбэттэн Черкашин П. Е., «Эрэл» түөлбэттэн Копырин К. И. Көрүү түмүгүнэн 1 миэстэни ылла «Эрэл» түөлбэ, 2 миэстэни ыллылар «Үрдэл» түөлбэ уонна олохтоох дьаһалта олохтообут анал бириистэринэн, грамотанан наҕараадаланнылар. Дьоро киэһэни киэргэттэ ыалдьыппыт Мистер «Туой Хайа-2023» күрэх кыайыылааҕа, «Анаабыр үрүҥ түүннэрэ-2022» Гран-при хаһаайына, «Эн сулускун-2022» бырайыак кыттыылаа5а, 30-тахса авторскай ырыалардаах, ырыа айааччы мелодист Тимур Корякин. Көрөөччүлэр тэрээһинтэн астынан ытыстарын тыаһын бэлэхтээтилэр, астына-дуоһуйа сынньаннылар.
