Ыам ыйын 8 күнүгэр Бороҕон нэһилиэгэр Бүтүн Россиятааҕы «Өйдөбүнньүк чүмэчи» акцияҕа кыттыһан киэһэ 21:30 ч «Кыайыы түһүлгэтэ» болуоссакка дьон-сэргэ тоҕуоруһа муһунна. Тэрээһиҥҥэ күргүөмүнэн сэрии кэминээҕи ырыалар доргуччу ылланнылар. Акцияҕа кыттыһан Кыайыы диэн тылга чүмэчинэн уурулунна. Нэһилиэк олохтоохторо сэриигэ кыттыбыт эһэлэрин, убайдарын, аҕаларын, таайдарын, тыылга үлэлээбит эбэлэрин, ийэлэрин, эдьиийдэрин кэриэстээн, ахтан-санаан өйдөбүнньүк чүмэчилэрин уматан уурдулар. Уоттаах кыргыһыыларга биһиги биир дойдулаахтарбыт хорсуннук сэриилэспиттэрэ, дьоммут-сэргэбит килбиэннээх үлэлэринэн кыайыыны уһансыбыттара. Хорсун быһыы кэмҥэ-кэрдиигэ бэриммэт, тугунан да кэмнэммэт нэһилиэстибэни харыстыырбыт барыбыт ытык иэспит. Ким да умнуллубат, туох да умнуллубат!
