Тохсунньу 27 күнүгэр «Түмсүү» норуот айымньытын киинигэр Уус-Алдан улууһун тыатын хаһаайыстыбатын салалтатын начальнигын эбээһинэһин толорооччу Сивцев Артем Николаевич Бороҕон нэһилиэгин тыа хаһаайыстыбатын үлэтинэн дьарыктанар дьону кытта көрсүһүүтэ тэриллэн ыытылынна. Көрсүһүү бастаан Элэһин учаастагын олохтоохторун кытта кэпсэтииттэн саҕаланна, манна тэриллиилээх хаһаайыстыбалар кыттан элбэх боппуруоһу туруорустулар, тыа хаһаайыстыбата сайдыытын кыһалҕаларын ырытыстылар. Салгыы мунньах Тумул бөһүөлэгэр кэлэн ыытылынна. Мунньахха 2026 сыллааҕы үлэ былаанын билиһиннэрии, саҥа уларыйыылар киирбиттэрин сырдатыы, санаа үллэстиитэ бэрт сэргэхтик ааста. Нэһилиэккэ тыа хаһаайыстыбатынан дьарыгыран олорор олохтоохтор мунаахсыйар боппуруостарын ыйыттылар, инникитин улууска тыа хаһаайыстыбата сайдар суолун торумнастылар, сүөһү иитиитигэр бэриллэр субсидия тула кэпсэтии сытыытык турда. Бу маннык көрсүһүүлэр тыа хаһаайыстыбатын үлэтигэр дьиҥ-чахчы көмөлөөх буолуо диэн эрэнэбит.
