Олунньу 10 күнүгэр «Тумсуу» норуот айымньытын киинигэр улуус, өрөспүүбүлүкэ культуратын сайдыытыгар сүҥкэн кылааттарын киллэрбит, Уус-Алдан улууһун баянистарын туһунан кинигэ тахсыытыгар аналлаах «Эйээр, дьиэрэй байааным!» акция кэнсиэр биһиги нэһилиэктэн саҕаланна. Кэнсиэргэ кыттыыны ыллылар улууспут баянистара — Станислав Луковцев, Константин Иванов, Иннокентий Готовцев, Николай Готовцев, Петр Копырин, ырыаһыттар Гаврил Свинобоев-Гайаат, Саргылаана Константинова, Иван Карпов, Валентина Варламова, Бороҕоннооҕу оҕо искусство оскуолатын байаан кылааһын үөрэнээччилэрэ Сема Москвитин, Петя Черкашин, Адриан Афанасьев, нэһилиэкпит баянистара Анатолий Габышев, Альберт Васильев, сыана ветераннара Анна Алексеева, Александр Сухонин, Люция Попова, Матрена Новоприезжая. Бу кинигэҕэ биһиги нэһилиэктэн араас сылларга баянистаабыт биир дойдулаахтарбыт Новоприезжий Анатолий Михайлович, Иванов Анатолий Иванович, Алексеев Иннокентий Ильич, Свешников Иннокентий Афанасьевич, Винокуров Петр Егорович, Габышев Анатолий Анатольевич, Васильев Альберт Николаевич киирдилэр. Нэһилиэк олохтоохторо тэрээһиҥҥэ кыттыһан, дьоннорун аатын үйэтитэн сэмэй кылааттарын уктулар. Уопсайа акция кэнсиэргэ 71.050 солк киирдэ, о.и. кэнсиэртэн киирии 9.300 солк, биирдиилээн дьонтон 61.750 солк киирдэ. Тэрээһинтэн көрөөччүлэр астынан сылаас ытыстарын тыаһын бэлэхтээтилэр, байаан тыаһыгар уйдаран дуоһуйа сынньаннылар. Салгыы бу тэрээһин улууспут нэһилиэктэринэн ыытыллыаҕа. Байааммыт алыптаах дорҕооно кэрэҕэ-сырдыкка ыҥыра туруохтун!
