Ахсынньы ый 31 күнүгэр «Түмсүү» норуот айымньытын киинигэр 2026 сылы көрсө бырааһынньыктааҕы дьоро киэһэ тэрилиннэ. Нэһилиэк Аҕа баһылыгын эбээһинэһин толорооччу Копырин К. М., Уус-Алдан улууһун Аҕа баһылыга Алексеев В. П. бырааһынньыктааҕы эҕэрдэлэрэ, наҕараадалааһын, сылын аайы ыытыллар үгэскэ кубулуйбут «Сыл бастыҥнара» үлэлэригэр, үөрэхтэригэр үрдүк ситиһиини көрдөрбүт нэһилиэкпит дьонун чиэстээн анал ааттары туттарыы үөруулээх чааһа ыытылынна. «Түмсүү» НАК директора Сухонина А. Е. 2025 сыл түмүгүнэн нэһилиэк культурнай тэрээһиннэригэр активнайдык кыттыбыт дьоҥҥо махтал суруктары, өйдөбүнньүк бэлиэлэри туттартаата. Ситиһиилээх дьоҥҥо, көрөөччүлэргэ анаан ылбаҕай ырыа ылланна, эҕэрдэ эгэлгэтэ этилиннэ. Бырааһынньыктааҕы киэһэни «Айыллан» норуот тыйаатырын артыыстара, ыччаттара кыттыылаах «Саҥа дьылга-саҥа дьол» музыкальнай-театрализованнай дьүһүйүүнэн салҕанна, 4 хартыыналаах Саҥа дьыллааҕы дьүһүйүү көрөөччү биһирэбилин ылла. Үүммүт 2026 сылынан Чысхаан оҕонньор, сиэнэ кыыс Хаарчаана, Саҥа Дьыл уолчааны көрөөччүлэр ытыс тыаһынан көрүстүлэр. Бырааһынньыктааҕы дьоро күн уоттаах-күөстээх дискотеканан түмүктэннэ.
