Бэс ыйын 15 күнүгэр Аҕа дойдуну көмүскүүр Улуу Кыайыы 80 сылын көрсө Россияҕа, Саха сиригэр Аҕа дойдуну көмүскээччилэр, Уус-Алдан улууһугар, «Бороҕон нэһилиэгэр» тыа хаһаайыстыбатын сылларыгар аналлаах Өрөгөй ыһыаҕа ыытылынна. «Ыһыах алгыһын куппар-сүрбэр иҥэрэн» ыһыах алгыһын сиэрин-туомун Саха республикатын культуратын туйгуна, алгысчыт, ырыаһыт Виталий Очиров түһүлгэҕэ мустубут ыһыах дьонун алҕаата, арчылаата. «Кымыс үрдүн охторуу» сиэрэ-туома ыытыллар түһүлгэтигэр тиийэн Бороҕон нэһилиэгин аҕа баһылыга Алексеев В. П. кымыс үрдүн охторорго анал чороону туттарда. Бу кэннэ мустубут дьон-сэргэ кыынньар кымыһынан сүрэхтэрин сөрүүкэттилэр, самаан сайын үөрүүтүн үллэстэн киин трибунаҕа ыһыах үөрүүлээх чааһыгар муһуннулар. Нэһилиэк Аҕа баһылыга В. П. Алексеев, сэрии кэмин оҕолоро Протопопова Зоя Ивановна, Барашкова Раиса Тихоновна үрүҥ тунах ыһыах бэлиэтин Ытык Дуоҕаны астылар. Ыһыах эҕэрдэ кэнсиэрэ Кыайыы 80 сылыгар аналлаах «Айыллан» норуот тыйаатырын артыыстара «Кыайыы сырдык дьаралыга» театрализованнай дьүһүйүүнэн саҕаланна. Бороҕон нэһилиэгин Аҕа баһылыга Алексеев В. П. Улуу Кыайыы үбүлүөйдээх Өрөгөй ыһыаҕынан эҕэрдэтин тиэртэ, үлэлэригэр үөрэхтэригэр ситиһиилэммит дьонун чиэстээтэ. Эҕэрдэ кэнсиэр үҥкүүнэн, ырыанан доҕуһуолланна, кэнсиэр киэргэлинэн Саха республикатын культуратын туйгуна, алгысчыт, ырыаһыт Виталий Очиров ыллаан-туойан, күргүөм оһуокайы тэрийэн үгүс дьону муста. Дьон-сэргэ ыһыах мааны аһыгар түөлбэлээн олорон ирэ-хоро кэпсэтэннэр, ыһыах ыытар күрэхтэрин сэргии көрдүлэр, ол курдук: түөлбэлэр икки ардыларыгар «Хоһуун үлэһит» эстафета 1 м «Эрэл» начальник Петухова П.М., 2 миэстэ «Дьулуур» начальник Капитонова Н. П., 3 миэстэ «Үрдэл» түөлбэ начальник Винокурова М. П. «Саха талба-мааны таҥаһа» күрэххэ 1 миэстэ Третьякова Туяра, 2 миэстэ Иванова Виолетта, 3 миэстэ Поисеев Айдар, 3 миэстэ Новикова Айыына. «Умнуллубат ол сыллар» хоһоон күрэҕэр 1 миэстэ Охлопкова Мария Ивановна, 2 миэстэ Халдеева Мария Романовна, 3 миэстэ Егорова Полина Прокопьевна, «Кыайыы оһуохайа» күрэххэ Кылаан чыпчаал Протопопова З.И, 1 миэстэ Бубякина В. С., 2 миэстэ Охлопкова М. И. «Олоҥхо дойдутун оҕотобун» күрэххэ 1 миэстэ Мальцева Рема, 2 миэстэ Иванова Виолетта, 2 миэстэ Барашков Даниил, 3 миэстэ Макаров Арылхан, анал бириис Васильев Родион. «Көмүлүөк» үһүс саас оскуолатын чилиэннэрин көрдөрүүтүгэр нэһилиэк исстэнньэҥэ, «Якутия мастеровая» республиканскай быыстапкаҕа «Бастыҥ өбүгэ таҥаһа» номинация кыайыылааҕа Габышева А. Г. тикпит таҥастарын дефилета көрөөччү дьүүлүгэр таҕыста. Маны таһынан ыһыах спортивнай күрэхтэригэр ол курдук: сүүрүү, кыыс эккирэтиитэ, хапсаҕай, мас тардыһыы, массыына соһуу, таас көтөҕүү күрэхтэр ыраахтан чугастан кэлбит спортсменнары түмэн бэрт тыҥааһыннаахтык, көхтөөхтүк ааста. Бары ыытыллыбыт күрэхтэргэ үбүлүөйдээх ыһыаҕынан сэрии ветераннарын, сэрии кэмин оҕолорун, тыыл, үлэ ветераннарын ааттарын ааттатан оҕолоро, сиэннэрэ, хос сиэннэрэ, аймахтар кыттыһан, спонсортство олохтоон Кыайыы ыһыаҕын таһымын үрдэттилэр. Киэһээ «Түмсүү» с/к Виталий Очиров, «Айыллан аартыктара» гастрольнай бөлөҕүн кэнсиэрэ олус истиҥник, толору саала көрөөччүлээх, ытыс тыаһа доҕуһуоллаах ааста. Ыһыах уоттаах-күөстээх «Үрүҥ түүн» дискотекатын салҕаата шоумен Иннокентий Владимиров-Кештиано. Ыһыах күн үрдүк таһымнаах ааспытыгар кыттыбыт нэһилиэк олохтоохторугар, ыһыах күрэҕэр дьоннорун аатын ааттаппыт, үйэтиппит биир дойдулаахтарбытыгар, төрөөбүт-үөскээбит төрүт түөлбэҕит үлэтэ-хамнаһа тахсарыгар күүс-көмө буолбуккутугар махталбытын тиэрдэбит.
