Ыам ыйын 22 күнүгэр Ньукуолун күн ТСТ Бороҕон нэһилиэгэр үтүө дьыаланан тутуллар спортзал тутуллуохтаах территориятыгар ыраастааһын үлэтэ, субуотунньук тэрилиннэ. Бу күн нэһилиэк күүстээх аҥардара түмсэннэр: олохтоох дьаһалта, ЖКХ, «Түмсүү» с/к, Тумул орто оскуолата, балыыһа тэрилтэрэлэрин эр дьоно, нэһилиэк олохтоохторо кыттыыны ыллылар. Маны таһынан бэйэлэрин баҕаларынан күүс-көмө буоллулар трактористар Алексеев Гаврил Гаврильевич, Алексеев Прокопий Прокопьевич, Бочкарев Гаврил Егорович, Барахсин Николай Михайлович, Васильев Виталий Федотович. Эбиэт кэмигэр «Түмсүү» сынньалаҥ киин кэрэ аҥардара минньигэс аһынан кус миининэн, пловунан, алаадьынан, үүттээх чэйинэн остуол тартылар, үрүҥ аһы дэлэтэр далбар хотуттар Вера Михайловна быырпаҕынан, баахыланан, Акулина Сокольникова алгыстаах алаадьынан, Ирина Алексеева сөрүүн сүөгэйинэн, Наталья Капитонова үрүҥ илгэ үүтүнэн, Леонид Егоров, Иван Сухонин байанайдаах бултарыттан куһунан күндүлээтилэр. Күүстээх үлэни үлэлээбит, үтүө дьыалаҕа кыттыспыт, күүс-көмө буолбут эр дьоннорбутугар олохтоохтор, Бороҕон нэһилиэгин аҕа баһылыга Алексеев В. П. ааттарыттан улахан махталбытын тиэрдэбит. Инникитин да бу курдук нэһилиэкпит чөл олоҕо сайдарыгар, спорт саалата түргэнник олоххо киирэрин туһугар бары бииргэ түмсүүлээх буолуохха, норуот күүһэ — көмүөл күүһэ.
