Ыам ыйын 23 күнүгэр «Түмсүү» сынньалаҥ киинигэр Саха өрөспүүбүлүкэтигэр ырыа күнүгэр аналлаах, самаан сайыны көрсө «Ырыа-олох аргыһа» диэн ырыа дьоро түһүлгэтэ ыытылынна. Кыттыыны ыллылар «Далбар», «Дьүөгэлиилэр» дьахталлар ансаамбыллара, «Туйма», «Күөрэгэй» ырыа бөлөхтөрө, оскуола 3 кылааһын үөрэнээччилэрэ «Дьүрүйэчээн» фольклорнай бөлөх, салайааччы Петрова В.П. Ырыа бырааһынньыгын киэргэттилэр нэһилиэк киэн туттар ырыаһыттара Василий Копырин, Марсен Протопопов, Степан Барашков, Иван Сухонин, Андрей Макаров, Сахаяна Аргунова, Мария Васильева, Матрена Афанасьевна сиэн кыргыттарынаан Сандаара, Сайнаара Новоприезжаялар, кырачаан ырыаһыттарбыт Василина Петухова, Сандаара Новоприезжая. Биһиги нэһилиэктэн республика араас мунньуктарыгар ыллыы-туойа, үлэлии-хамсыы сылдьар ыччаттарбыт ырыа дьоро күнүгэр кыттыһан нэһилиэк олохтоохторугар бэйэлэрин эйэҕэс эҕэрдэлэрин ыыттылар, ол курдук Надежда Новоприезжая, Николай Новгородов, Аман Анхаров, Василий Новоприезжай, Вера Яковлева. Ырыа түһүлгэтин иилээн-саҕалаан ыытта Прасковья Петухова. Көрөөччүлэр дьоро киэһэттэн астынан, дуоһуйан ытыстарын тыаһын бэлэхтээтилэр. Ырыа күнэ ыраахха дуорайдын, ырыаны аргыс оҥостон ыллыы-туойа сылдьыахха.
