Кулун тутар 18 күнүгэр Мүрү нэһилиэгэр «Тойон Мүрү» культура дыбарыаһыгар Уус-Алдан улууһугар культура отдела тэриллибитэ 80 сылыгар аналлаах «Күн эйгэ» культура декадатын үөрүүлээх аһыллыытыгар «Түмсүү» сынньалаҥ киин үлэһиттэрэ кыттыыны ыллылар. Тэрээһин бастакы чааһыгар «Судьбы окрыленные культурой села» улуус культуратын салаатыгар бастыҥ туруу үлэһит дьонун билиһиннэрэр сыаллаах быыстапканы көрөөччү дьүүлүгэр туруордулар, кэпсээтилэр. Биһиги нэһилиэктэн өр сыл библиотекарынан үлэлээбит, Саха республикатын культуратын туйгуна, культура бочуоттаах ветерана, Уус-Алдан улууһун норуотун маастара Халдеева Анна Романовна айымньылаах үлэтин сырдаттылар. Улуус культуратын үлэһиттэрин күүһүнэн туруоруллубут «Кун эйгэ» кэнсиэргэ «Туйма» бөлөх уолаттара толоруутугар «Оҕо санаам оонньуута» ырыаны ыллаан көрөөччү биһирэбилин ыллылар. Маны таһынан «Бэтэкэй бэтиэкэлэрэ» көр-күлүү бөлөҕүн артыыстара «Сэдэх бэлэх» сценканы оонньооннор көрү көҕүлүттэн туттулар. Дьоро күҥҥэ улуус культуратын үлэһиттэрин күүһүнэн 32 нүөмэр биир тыынынан өрө көтөҕүллэн хас биирдии нүөмэр дохсун ытыс тыаһынан доҕуһуолланна. Түмүккэ уопсай хаартыскаҕа түһүүнэн тэрээһин түмүктэннэ.
