Бэс ыйын 21 күнүгэр Элэһин учаастагар Үрүҥ-тунах ыһыах ыһылынна. Ыһыах сэрии ветерана, бастыҥ биригэдьиир Дмитрий Дмитриевич Копырин төрөөбүтэ 100 сааһыгар, Улуу Кыайыы 80 сылыгар ананна. Бу өрөгөйдөөх түһүлгэни оҕолоро, сиэннэрэ, хос сиэннэрэ тэрийэн ыыттылар. Бороҕон нэһилиэгин депутаттарын быһаарыытынан Элэһин сынньалаҥ киинигэр Копырин Дмитрий Дмитриевич аата иҥэрилиннэ, аҕаларын аатын үйэтитэр, үүнэр көлүөнэҕэ билиһиннэрэр сыаллаах сынньалаҥ киин иннигэр бюст туруорулунна. Ыһыах алгыһын сиэрин-туомун оҥордо алгысчыт-Черкашин Петр Егорович. Ыһыах торжественнай чааһыгар Бороҕон нэһилиэгин аҕа баһылыга Алексеев Василий Петрович эҕэрдэтэ, наҕараадалар, ону тэҥэ Копырин Дмитрий Дмитриевич «Лена» совхозка бииргэ алтыһан үлэлээбит үөлээннэхтэрэ Яковлев Алексей Егорович, Портнягин Семен Иннокентьевич, Барашкова Раиса Тихоновна, Попов Данил Михайлович, Пермяков Николай Николаевич, Охлопков Степан Степанович эҕэрдэ тылларын эттилэр, бииргэ үлэлээбит кэмнэрин ахтан-санаан аастылар. Түөлбэлээн олорон аһылык кэннэ эҕэрдэ кэнсиэр тэрилиннэ. Кэнсиэри киэргэттилэр Элэһинтэн төрүттээх ырыаһыттар, ыалдьыттар иилээн-саҕалаан ыытта Элэһин кулуубун үлэһитэ Соловьев И. С. Кэнсиэр кэннэ ыһыах культурнай күрэхтэрэ ыытылыннылар ол курдук: уһун суһуох күрэххэ кыайыылааҕынан Варвара Михайловна Попова, саха таҥаһын күрэҕэр кыайыылаахтарынан Гаврил Гаврильевич Алексеевтар дьиэ-кэргэн, оһуохай күрэҕэр кыайыылааҕынан Зоя Ивановна Протопопова. Ыһыах спортивнай күрэхтэрэ бэрт тыҥааһыннаахтык ыытылыннылар ол курдук: хапсаҕай, халадаайдаах сүүрүү, мас тардыһыыта күрэхтэргэ бастыҥнары быһаардылар. Маны таһынан саамай дьон болҕомтотун ылан пятиборье күрэх ыытылынна. Күрэххэ уопсайа улуус нэһилиэктэриттэн 8 кыттааччы кыттыыны ыллылар. Илин-кэлин түсүһүү кэннэ, бэрт эрэллээхтик кыайыылааҕынан Элэһин олохтооҕо Спартак Русланович Попов таҕыста уонна Копырин Дмитрий Дмитриевич уола Алексеев Егор Дмитриевич туруорбут убаһа бирииһинэн наҕараадаланна. Элэһин олохтоохторо үөрэн-көтөн, дуоһуйа сынньанан уйгу-быйаҥ ыһыаҕы үрдүк таһымҥа ыыттылар.
