Олунньу 14 күнүгэр тапталлаахтар күннэригэр, Россияҕа дьиэ-кэргэн сылынан «Арчы» дьиэтигэр Бороҕон нэһилиэгин икки эдэр ыаллара ыал буолар күннэрин бэлиэтээн сахалыы уруу сиэрэ-туома ыытылынна. Ол курдук Ирена, Конон Гороховтар, Дарья, Константин Копыриннар кэргэннии буолбут туоһу суруктарын нэһилиэк ЗАГС үлэһитэ Прудецкай Ф. В. туттарда, сахалыы сиэринэн ыал буолуу сиэрэ-туома оҥоһулунна. Эдэр дьон ыал буолбут бэлиэлэрин «Арчы» дьиэтигэр ааттаах-суоллаах сахалыы харысхаллары ыйаан хааллардылар. Эдэр дьиэ-кэргэттэргэ алгыһын анаата, сыана ветерана алгысчыт — Сокольникова А. С. Нэһилиэк аҕа баһылыга Алексеев В. П. эҕэрдэ суруктары, бэлэхтэрин туттарда. Эдэр ыалга баҕарабыт бигэ-тирэхтээх олоҕу, уостубат тапталы, уйгуну-быйаҥы, нэһилиэкпитигэр элбэх эдэр ыал эбиллэ туруохтун.
