Алтынньы ый 28 күнүгэр «Түмсүү» норуот айымньытын киинигэр Арассыыйаҕа норуоттар сомоҕолоһууларын, Саха өрөспүүбүлүкэтигэр Култуура, Уус-Алдан улууһугар Түмсүү уонна бииргэ үлэлэһии сылларыгар анаммыт «Кэхтибэт талааннар» улуус бэтээрээннэрин Сэбиэттэрин бэстибээлэ тэрилиннэ. Кэлбит ыалдьыттары арыылаах алаадьынан, кыынньа сылдьар кымыһынан нэһилиэк далбар хотуттара айах тутан сахалыы сиэринэн көрүстүлэр. Кулууп фойетыгар «Көмүлүөк», «Аал уот» түмсүүлэрэ холбоһон талба талааннаах уран тарбахтаахтара быыстапка туруордулар.Нэьилиэк тэрилтэлэрэ, чааьынай дьон буфет үлэлэттилэр. Бэстибээлгэ кыттыыны ыллылар Суотту, Бэйдиҥэ, Курбуһах, Тумул аҕам саастаах ытык дьонноро уопсайа 108 кыттааччы кыттыыны ылла. Бэстибээл үөрүүлээх арыллыытыгар Бороҕон нэһилиэгин баһылыга Копырин К. М. эҕэрдэ суругу, өйдөбүнньүк бэлэҕи улуустааҕы бэтэрээннэр Сэбиэтттэрин бэрэссэдээтэлигэр И. И. Колодезниковка, нэһилиэктэр бэтэрээннэрин сэбиэтин бэрэссэдээтэллэригэр туттарда. Салгыы Суотту нэһилиэгин бэтэрээннэрин Сэбиэтин бэрэссэдээтэлэ Е. И. Свинобоева эҕэрдэлээн туран Бороҕон нэһилиэгин баһылыгар махтал суругун туттарда. Аҕам саастаахтар ирдэбил быһыытынан бииртэн биир чаҕылхай нүөмэрдэри көрдөрдүлэр. Бэстибээл саамай аҕам саастаах дьоно Бороҕон нэһилиэгиттэн Протопопова З. И., Курбуһах нэһилиэгиттэн Винокуров С. Ф. ааттара ааттанна. Көрүү түмүгүнэн уопсай түмүккэ Суотту нэһилиэгэ 4, 85, Бороҕон нэһилиэгэ 4,89, Өлтөх нэһилиэгэ 4, 91, Курбуһах 4,97 бааллары ылары ситистилэр. Кэнсиэри иилээн-саҕалаан ыыттылар Суоттуттан Надежда Черкашина, Өлтөхтөн Прасковья Сивцева, Курбуһахтан Зинаида Григорьева, Тумултан Анна Парникова. Кэнсиэр кэннэ Бороҕон нэһилиэгин аҕам саастаахтара минньигэс астаах фуршет тэрийдилэр, Арыы-Тиит кулуубун уус-уран салайааччыта Л. П. Заровняева , Элэһин кулуубун уус-уран салаайааччыта И. С. Соловьев сынньалаҥ биэчэрин тэрийдилэр. Куруутун бу курдук түмсүүлээх буолуоҕуҥ, аҕам саастаах ытык дьоммутугар этэҥҥэ буолууну, чэгиэн доруобуйаны баҕарабыт.
