Балаҕан ыйын 2 күнүгэр Бороҕон нэһилиэгэр, Аан дойдуга аҕам саастаахтар декадаларынан, Арассыыйаҕа норуоттар сомоҕолоһууларын сылын чэрчитинэн «Олохпут көмүс күһүнэ» бырааһынньыктааҕы тэрээһин ыытылынна. Тэрээһиҥҥэ «Түмсүү» норуот айымньытын киинин иһинэн үлэлиир «Аал уот» кырдьаҕастар сэбиэттэрэ, » Көмүлүөк» үһүс саас оскуола түмсүүтэ, дьиэҕэ олорор ытык кырдьаҕастарбыт, нэһилиэк социальнай үлэһитэ А.М.Парникова кыттыыны ыллылар. Үбүлүөйдээх ытык кырдьаҕастарга сэмэй бэлэхтэр туттарылыннылар, эҕэрдэ тыллар этилиннилэр. «А.Р. Халдеева» аатынан модельнай библиотека сэбиэдиссэйэ Прудецкая С.А. «Култуура уонна Сомоҕолоһуу» сылларыгар аналлаах кинигэ быыстапкатын сырдатта, викторина ыытта. «Аал уот» түмсүү казначейа В.У.Новоприезжий уонна салайааччы П.Е.Черкашин сыллааҕы түмүктэри, былааннары билиһиннэрдилэр. Үһүс саас оскуола чилиэттэрэ бастакы чуорааннарын лыҥкыначчы тыаһатан үөрэх дьыла арыллыбытын туоһулаатылар. Бырааһынньыкка «Күһүҥҥү киэргэл»уонна араас норуот бүлүүдэтэ күрэхтэргэ кыттыбыт ыалдьыттарга өйдөбүнньүк бэлэхтэр туттарылыннылар. Аҕам саастаахтарбыт итии чэйдээх остуол тула олорон ирэ-хоро кэпсэтэн, араас көрдөөх оонньууларга оонньоон, бэйэлэрин кэминээҕи муузыкаларынан Музлото оонньууга үҥкүүлээн үөрэн-көтөн, сэргэхсийэн тарҕастылар. Маннык тэрээһиннэр кырдьаҕас дьоммутугар үгэс эрэ быһыытынан бэлиэтээһин буолбакка, аҕа көлүөнэ дьоҥҥо күннэтэ ахсаабат болҕомто, истиҥ кыһамньы бэлиэтэ буолар.
