Бэс ыйын 17 күнүгэр Элэһин уч. Россияҕа Педагог уонна Наставник, Саха республикатыгар Үлэ, Уус-Алдан улууһугар Инфраструктура сайдыытын сылларын көрсө Үрүҥ тунах ыһыах ыытылынна. Ыһыахха араас улууска олорор Элэһинтэн төрүттээхтэр, чугас нэһилиэктэртэн ыалдьыттар тоҕуоруһа муһуннулар. Ыһыах аһыллыытын сиэрин-туомун С. И. Стрекаловская уот эһэккэтин уохтаах кымыһынан, үрүҥ сылгы сиэлинэн, арыылаах алаадьынан айах тутан алҕаан арыйда. В.В Никифоров-Күлүмнүүр аатынан ,,Тойон Мүрү» культура дыбарыаһын директора Гоголев М.П улуус культуратын аатыттан Элэһин олохтоохторун, Үрүҥ тунах ыһыаҕынан эҕэрдэтин тиэртэ, Бороҕон нэһилиэгин Аҕа баһылыга В.П.Алексеев олохтоохтору эҕэрдэлээтэ, наҕараадалары туттарда. ,,Самаан сайыны уруйдаан» эҕэрдэ концеры В.В Никифоров-Күлүмнүүр аатынан ,,Тойон Мүрү» специалиһа, Элэһинтэн төрүттээх Саина Стручкова уонна Элэһин кулуубун специалиһа Ион Соловьев кэнсиэри салайан ыыттылар. Ыһыах ыалдьыттара түөлбэлээн олорон түһүлгэлэринэн аһаатылар. ,,Эллэй эһэбит саҕаттан» оһуохай күрэҕэ, ,,Саха талба мааны таҥаһа», ,,Толбоннурар уһун суһуох» күрэхтэр буоллулар. ,,Саха талба мааны таҥаһа» саха таҥаһын күрэҕэр кыайыылааҕынан Саина Стручкова буолла уонна 20.000 солк уу харчынан наҕараадаланна. ,,Толбоннурар уһун суһуох» күрэх кыайыылааҕынан Өлтөх нэһилиэгиттэн Бэйдиҥэ орто оскуолатын10кл.үөрэнээччитэ Элэьинтэн теруттээх Кэрэчээнэ Татаринова буолла уонна үрүҥ көмүстэн оҥоһуллубут сахалыы кэмпилиэк киэргэлинэн наҕараадаланна. ,,Эллэй эһэбит саҕаттан» оһуохай күрэҕэр кыайыылааҕынан таҕыста Протопопова Зоя Ивановна. Спортивнай күрэхтэһиилэр араас көрүҥнэргэ буоллулар, кыайыылаахтар уу харчынан, сыаналаах бириистэринэн наҕараадаланнылар. Ол кэннэ уоланнарга анаан «Уруц уолан» биэс көрүҥҥээх күрэхтэһии дьон болҕомтотун тарта. 1миэстэ Иннокентий Заровняев (Элэһин) ООО.,,Теплый рай» ген. директорыттан, Элэһинтэн сыдьааннах Иванов Ньургун Иванович туруорбут 50.000 т сертификат. 2 миэстэни ылла Сергей Алексеев (Элэһин) строительнай рынок ген. директора, Ил Түмэн депутата Данилов И.И олохтообут ,,Патриот» дружбанан наҕараадаланна. 3 миэстэни Иван Максимов (Тумул) ылла уонна Данилов И.И. олохтообут болгаркатынан наҕараадаланна. 4м Уйгун Алексеев (Элэһин) Иванов Нь. И. олохтообут 5000 солк уу харчыны тутта. Киэһэ өттүгэр ,,Самаан сайын бэлэҕэ» сүүйүүлээх оонньуу, ырыа-тойук, тарбахтарыгар талааннаах, бааттаах дьон илии тутуурдаах, өттүк харалаах бардылар, үрүҥ тунах ыһыаҕы дьон-сэргэ астынан, сынньанан дьиэлэригэр тарҕастылар. Ыһыах күрэхтэригэр күүс-көмө буолбут спонсордаабыт биир дойдулаахтарыгар Элэһин олохтоохторо улахан махталларын тиэртилэр.
