Бэс ыйын 11 күнүгэр Бороҕон нэһилиэгэр Россияҕа Педагог уонна Наставник, Саха республикатыгар Үлэ, Уус-Алдан улууһугар Инфраструктура сайдыытын сылларын көрсө үрүҥ тунах ыһыах ыытылынна. «Ыһыах алгыһын куппар-сүрбэр иҥэрэн» ыһыах алгыһын сиэрин-туомун Саха республикатын культуратын туйгуна, алгысчыт, ырыаһыт Виталий Очиров түһүлгэҕэ мустубут ыһыах дьонун алҕаата, арчылаата. «Кымыс үрдүн охторуу» сиэрэ-туома ыытыллар түһүлгэтигэр тиийэн Бороҕон нэһилиэгин аҕа баһылыга Алексеев В. П. кымыс үрдүн охторорго анал чороону туттарда. Бу кэннэ мустубут дьон-сэргэ кыынньар кымыһынан сүрэхтэрин сөрүүкэттилэр, самаан сайын үөрүүтүн үллэстэн киин трибунаҕа ыһыах үөрүүлээх чааһыгар муһуннулар. Нэһилиэк Аҕа баһылыга В. П. Алексеев үрүҥ тунах ыһыах бэлиэтин Ытык Дуоҕаны анньан ыһыах саҕаламмытын биллэрдэ. Ыһыах ыҥырыылаах ыалдьыттарынан Уус-Алдан улууһун баһылыгын солбуйааччы С.С.Бурнашев, биир дойдулаахтарбыт ини-бии Габышевтар ааттаннылар. Бу сылга үлэлэригэр үрдүк ситиһиилээх дьоммут, ветеран педагогтар, СВО кыттыылааҕа Прокопьев Г.Г. үөрүүлээх быһыыга-майгыга наҕараада тутан үөрүүлэрэ үксээтэ. Ыһыах концера үҥкүүнэн, ырыанан доҕуһуолланна, концерт киэргэлинэн Саха республикатын культуратын туйгуна, алгысчыт, ырыаһыт Виталий Очиров ыллаан-туойан, күргүөм оһуокайы тэрийэн үгүс дьону муста. Дьон-сэргэ ыһыах мааны аһыгар түөлбэлээн олорон ирэ-хоро кэпсэттэннэр, ыһыах ыытар күрэхтэрин сэргии көрдүлэр, ол кэннэ ини-бии Габышевтар туруорбут бириистэригэр 7 көрүҥҥэ илин-кэлин түһүстүлэр. Ол курдук саастарынан оҕолорго, улахан дьоҥҥо сүүрүү, хапсаҕай, мас-тардыһыыта, тутум эргиирэ, хабылык, үс төгүл үс, уонна 35 сааһыгар дылы үрүҥ уоланнарга анаан 5 көрүҥҥэ күрэхтэр ыытылыннылар. Киэһэ «Түмсүү» с/к «Сайыны уруйдаан» нэһилиэк талааннаахтарын эҕэрдэ концера, «Бааттаах түгэн» розыгрыш бэрт сэргэхтик ааста. Концеры иилээн-саҕалаан ыытта Вадим Сыроватскай, көрөөччүлэр дохсун ытыс тыаһынан көрүстүлэр ырыаһыт Кэрэчээнэ Туприна, Инна Наина Алексеевалары, Нарыйа Старостинаны, Иннокентий Владимиров-Кештиано дьон-сэргэ биһирэбилин ыллылар. Ыһыах уоттаах-күөстээх «Үрүҥ түүн» дискотекатын салҕаата шоумен Иннокентий Владимиров-Кештиано.
