От ыйын 1 күнүгэр Бороҕон нэһилиэгин Арыы-Тиит учаастагар Россияҕа Педагог уонна Наставник, Саха республикатыгар Үлэ, Уус-Алдан улууһугар Инфраструктура сайдыытын сылларын көрсө үрүҥ тунах ыһыах ыытылынна. «Айыы күүһүнэн арчыланыы» ыһыах алгыһын сиэрин-туомун ыытта биир дойдулаахпыт Иннокентий Иннокентьевич Алексеев. Түһүлгэҕэ мустубут ыһыах дьонун алҕаата, арчылаата. Ыһыах үөрүүлээх чааһыгар бу сылга үлэлэригэр үрдүк ситиһиилээх дьоммутугар үөрүүлээх быһыыга-майгыга Уус-Алдан улууһун баһылыга А. В. Федотов, Бороҕон нэһилиэгин баһылыга В.П.Алексеев олохтоохтору үрүҥ тунах ыһыаҕынан эҕэрдэлээтилэр, наҕараадалары туттардылар. «Самаан сайын» эҕэрдэ концерт үҥкүүнэн, ырыанан доҕуһуолланна, концеры иилээн-саҕалаан ыытта Элэһин СК специалиһа И. С. Соловьев. Ол кэннэ дьон-сэргэ ыһыах мааны аһыгар түөлбэлээн олорон ирэ-хоро кэпсэтэннэр, ыһыах ыытар күрэхтэрин сэргии көрдүлэр, ол курдук «Сахам мааны таҥаһа», «Дьиэрэй алааһым ырыата», «Түмэр күүс-оһуокай» оһуокай күрэҕэ, өбүгэ оонньуулара: эр дьоҥҥо, оҕолорго хапсаҕай, дьахталларга, эр дьоҥҥо, оҕолорго мас тардыһыыта, кыргыттарга халадаайдаах сүүрүү , алын кылаас оҕолоругар сүүрүү. Хас биирдии көрүҥҥэ Бороҕон нэһилиэгин дьаһалтата, Арыы-Тиит тэрилтэлэрэ, олохтоохторо, Арыы-Тииттэн төрүттээх биир дойдулаахтара бириистэри олохтоотулар. Уонна ыһыах дьонун тумтэ биир дойдулаахтара Гаврил Шепелев, ыччат уолаттар көҕүлээһиннэринэн тэриллибит «Модун Мохсоллор» 15-18 сааһыгар диэри Арыы-тииттэн төрүттээх уоланнарга анаан ыыттыллыбыт многоборье күрэх. Кыайыылааҕынан 11 кылаас үөрэнээччитэ Проня Татаринов буолла, 2 миэстэ 9 кл үөрэнээччитэ Эрхаан Копырин, 3 миэстэ Сайдам Копырин. Сүрүн спонсардарынан урбаанньыт уолаттар Альберт Михайлович Стрекаловскай «Мясной двор», Мельников Арсентий Владимирович «InterRoom kids», «Авто спас» Оллонов Гаврил Прокопьевич, «СеверГазАвто ГБО» Татаринов Василий Николаевич уонна Арыы-Тииттэн төрүттээх уолаттар уу харчынан 1 м. 25 тыһ. солк, 2 м. 15 тыһ. солк, 3 м. 10 тыһ. солк., ону таһынан хас көрүҥ аайы кыайыылаахха 3800 солк. туттардылар. «Тутум эргиир» көрүҥ кыайыылааҕар Копырин Сайдамҥа бэйэтин спец приһын 2 Лөгөй нэһилиэгин бочуоттаах олохтооҕо, ветеран спортсмен, учууталлар учууталлара Троева Раиса Николаевна 5000 солк. туттарда. Маны таһынан И. С. Соловьев «Самаан сайын бэлэҕэ» сүүйүүлээх розыгрыш оонньотто, сүрүн бирииһи «Смарт» телевизоры элбэх о5олоох ыал Кылаевтар дьиэ-кэргэн сүүйэн үөрүүлэрэ үрдээтэ. Үрүҥ тунах ыһыаҕы дьон-сэргэ астынан, сынньанан дьиэлэригэр тарҕастылар. Ыһыах тэрээһинигэр күрэхтэһиилэригэр күүс-көмө буолбут спонсордаабыт биир дойдулаахтарыгар Арыы-Тиит олохтоохторо улахан махталларын тиэртилэр.
